Monologo strolicu di
Scritturi e …aedo pi natura
Personaggi: Uno
Premessa:
Quannu ci mettu manu nta nu travagghiu, nun sacciu di precisu chiddu ca fazzu, chiddu ca penzu, chiddu ca scrivu.
Partu da n’idea ca mi veni ‘n menti, chissacciu, macari m’anzonnu, osia ammentri sugnu in dormivegghia, o ammentri ca caminu sulu e pinzirusu.
St’ideuzza appoi la pisu, a valutu , l’arriminu, finu a quannu mi veni “ a vena” quagghia e allura attaccu.
Stu prisenti travagghiuzzu lu pinzai propriu stamatina, ma lu prolugu ( a puisia) lu scrissi tempu addietru.
Ascutati,
amici mei, chi cosa ci scrissi quannu ci cangiaruno u nnomu d’a strata intitolata a cumpari Ninu.
Vegnu e mi spiegu:
A ta sapiri ca ‘ nto paisi di San***********lo, a cusà cchi, ci vinni u sghiribizzu di intestari na strata a un paisanu mortu, ‘nuccenti nta n’attintatu terroristicu.
Bedda pinzata, diciti vui.
Bellissima, dicu ju in talianu…ma,…ma…
Ma ascutati chi veni appressu. Dunchi:
Penza ca ti ripenza, cu fu o cu nun fu, nto Comuni, ‘n si sa chi, fici na bedda pinzata giniali: d’intestare a strata comunali a ssa povera vittima, c’o sistema spogghia a Cristu e vesti a Maria.
Comu, comu? V’addumannati.
Accussì, semplici semplici: luvamu a vanedda ‘ntistata a Ninu Martogghiu e a ramu a ssu mischineddu.
Detto fatto …ficiriu l’abbominiu: apprima, cu primura, ci attaccarunu na cartazza supra la targa d’a via, co nnomu da vittima; e appo, in segutu, ci ficiru na targa in ceramica di Cattaggiruni, bedda pulita, cu tutti i sacramenti, ca scritta supra u nnomu di ddu pavuru Cristu morto pi casu.
E a Ninu? Nuddu ca pinzò!
Forsi l’abbianu, metaforicamenti, nta munnizza, penzu, comu na cosa fitusa, ca ‘n servi cchiù.
Ca comu! Vi meravigghiati?
E picchì, casumai, cu fu ssu furasteru?
E cu lu canusci a ssu catanisi.
Avaja,
Pri casu fu nu Giufa?
Annunca mastru Austinu Miciaciu?
O chissacciu macari Pinco Pallino, pi dilla in talianu?
Ahu, sciavuni! Ci ricissi, ‘n fu accussì,- comu forsi pinzati da… minchiuni.
Iddu fu nu grann’umu.
‘Mbeh, e allura?
Comu allura?
Ahu, amministraturi, beddi valenti, istruitivi, pigghiati carta e pinna e scriviti.
Anzi no, aspittati, prima vi dicu chiddu ca pianzai ju ( e appoi scrissi) quannu visti “allibito” a vostra bedda “pinzata” ( pi ‘n diri minchiata), ca mi fici aggilari lu sangu.
Ascutati, amici mei, chiccosa mi vinni in menti:
Lu ’ncuntrai stancu e afflittu
Appuiatu ‘n pizzu di cantunera,
“ ‘Nbari Ninu, -ci spiai d’acchittu -
Chi fu? scunzulatu di sta manera! ”
“ E chi t’aiu a diri, Ninuzzu miu
-M’arrispunniu cu ‘n filu di vuci,
Eru dda assistimatu da Diu,
Nta sta vanedda nica, e chin’i luci,
Bidduzza e cu tanta bona genti...
Quannu m’impicaru ssa tabbella,
Dicennu:” Vottinni beddu valenti;
Pigghit’a truscia e lassa ssa stratella-
Ca c’attocca a ‘n paisanu - Smamma!”
“Maistru miu, chista è jella!” –
(Ci dissi, pi cunsular’ a bonamma.)-
Ora mi diciti, senza se e senza ma: chi bisognu c’era di dari u sfrattu a Cumpari Nino?
Nu c’erunu pri casu nta ssu paisi nomi di strati senza “dignità acquisita” per opere o pinzeri? Chissacciu, pi casu, nnomi streusi?
Un esempiu? eccu: Via Sant……. Nuovo. E cchi significa? Chi voli diri? Chi ‘mpurtanza ci avi? (C’appoi è na strata assai cchiu granni di chidda ‘ntistata ’o Zu Ninu- tantu pi sapillu).
E allura? Scunghiuruti, chi sintiti diri? Ah, vuliti diri ca lu vostru concittadinu ( purtroppo) mortu ammazzatu, era nu casu eroicu? Aveva sirvutu la Pattria? Aveva contribuitu a aumintari a cultura di l’omini tutti? Oppuru, pri casu, nasciu nta sta vanedda? No veru?
Avaja, parramu seriamenti. ‘Nzumma, cu tuttu lu rispettu, fu sulu nu mischineddu ca ci appizzò la vita, innucentemente, ammentri ca pigghiava u trenu pi turnari in Sicilia.
Puvurazzu!
Tantu di cappeddu!
E tantu di strata! (macari, chissacciu, via Messina- attaccata a vanedda- ca pi sicuru si sintissi onorata di scanciarla col defunto vittima nnuccenti)
Ma quali! Luvamaccilla a Martogghiu, tanto è mortu e nun po parrari.
Allura siti recidivi, mi veni di pinzari.
Ma…arrivari a tantu, altru ca sacrileggiu morali, è na tagghiatina di facci bella e bbona e…reali.
Ca comu? smoviri (osia dari lu sfrattu!) a nu pirsunaggiu ca è statu nu granni commediografu, narratori, regista, giornalista, ‘nzumma uomunu d’ingegnu e di raggiunamentu, vi pari na cosa seria?
Na cosa giusta?
Au! Macari cu li megghiu intinzioni- ca nun ci cridu – chissa è na vastasata, sintiti a mia.
Ma cosa fatta capu avi, si riceva na vota
Allura, pi cunzolu, doppu a puisia,
o zu Ninu
ci vogghiu fari na specie di…litania.
Ca è chista:
Zu Ninu
nun vi pigghiati di collira, sintiti a mia,
nu momumentu, ‘n trofeu p’o munnu,
na cosa troppu granni è vossia.
ca nnomi e cugnomi nun ci sunu
pi abbrazzarla tutta, e così sia.
Inzumma, tanto pi capiri- e farici capiri a ssi scunchiuruti- Maistru, mu dici comu ti vinni ‘n menti di scriviri “San Giuvannui decollatu?”
Avaja chissi fu ‘n coppu di geniu.
E a mastru Minicu, unni u mittemu? Nta n’altarinu pi cunzularlu d’a mancata razzia picchì ‘n ci fici cascari a lingua a so muggheri?
E a Cola Dusciu? Chi ‘n ci facemu a festa? Ma comu, mischineddu fu menzu tagghiatu in dui … in continenti e nun ci facemu mancu ‘n salamaleccu?
Vih, e chi semu di mammuru!
Va beni, va beni, a carrapipana u fici menzu fissa (menzu, picchì iddu rapiu l’occhi in tempu) ma appoi si vistiu d’autorità: Scuzzetta, marruggiu sciallu e pipa e …vai così Niculinu, ripigghiti a dignità …ferita (c’appoi, in cunfurenza, dimmi a virità, nun ci varagnasti nenti? Macari, chissacciu, na notti d’amuri? Ah?)
Uora, Maistru miu, ti vogghjiu consulari,
ascuta:
Tantu tempu fa, assemi a nu bravu attori, misimu in scena ssa to cummedia. Nenti di particulari: Tu facisti tuttu. Ma ju ideai lu ritornu alla “condizione di possidente” sicilianissimu, nta sta manera, ascuta:
Fici a vistizioni.
Comu, comu, mi po’ diri tu.
Eccu comu fu:
Saputo ca Milla Milord era a carrapinana ca l’ava ngannatu, Cola, comu da copiuni, addivintò na furia, vuleva ammazzarisi, vuleva fari nu macellu; ma, appoi, cu ‘n coppu di geniu, sicunnu mia, si la jucò accussi (cu ‘n ‘anticchia di…manumissioni do’ sottoscrittu) :
S’assittò nta la so puttruna prifirita, o quali aspittò a sso suruzza Marastella- ca trasiu cu nu maruggiu nta na manu, e na l’autra lu sciallu- accumpagnata da so criata ca tineva in manu nu cuscinu unni c’eranu misi a scuzzetta, a pipa, e i pospiri di lignu.
Marastella ci misi ‘ncoddu a Cola lu sciallu, comi si fussi l’ermellinu, e in testa ci appuggiò a scuzzetta come na curuna, poi ci resi u marruggiu comu simbolo del comando e ci misi nta ucca a pipa. Appoi ci l’addumau che pospiri di lignu, e, infine si mise a so destra, mentri a criata si misi a sinistra, quindi fice trasiri Milla a carrapipana. E chiddu ca successi tu lu sai megghiu di mia.
Uora - scusannimi sempri p’o ” tu” rispittusu ca mi primmittu, alli voti, ca ti dugnu - m’aviss’a diri unni canuscisti a Cicca Stonghiti e messer Rapa?
Varda chi ti dicu: Visti “I Civitoti” o Tiatru Muscu, nel 1960 – si nun sbagghiu – e Cicca a faceva a bonamma di Rusina Anselmi mentri Messer Rapa lu faceva Turi Ferro picciutteddu.
Che dire: M’arricriai, mi scialai, m’addivittii, ‘nzumma: Nu spassu!
Appoi, mancu a dillu, anni addietru, mi visti “Annata ricca, massaru cuntentu” nta nu tiattru ca ‘n m’arriordu chiù u nnomu, ma che era diretto da Michele Abbruzzo o quali faceva a parti do liuni. E chi fu? Fu na festa!
Immagginati a Michele ca abballa c’o carateddu, ca l’accarezza, ca ci manna baci, ca lu chiama cu milli nomi duci. ( tra parentesi u regista era ‘n’amicu miu, Petru Pitinu).
Munca, nta “Arti di Giufà” ‘n ti livasti tanti sassolini nte scarpi.
Avaja dimmi la virità: ti lavasti lu stomacu e ci nni ricisti na carittata a chissi di Roma, ca facevanu u cinimatografu da cinimatografari - senza arti ne parti.
E putissi cuntinuari parrannu do Marchisi di Ruvulitu, d’o Cuntrà, d’o Riffanti, da Vilanza, d’o Matrimonio nta civita e via accussì, ma ti facissi addivintri russo do piaciri, è vero?
Ma nun è chistu lu mumentu.
E allura, turnannu a bumma, ddi strolighi, chi ni sanu?
Chi ni sanu chissi ca coi to cummedii facisti allianari ginirazioni di siculiani afflitti da tutti i malanovi fatti e misfatti a… piaceri, nta sta Terra bedda duci e sapurita?
E ancora, cchi ni sanu ssi signuri di la to puisia? Chidda in sicilianu, populari e picaresca, di cui fusti Maistru e aedu?
Mintemu: Chi nni sanu chiddi d’a “Centona”?
Fatta di sunetti, cunti e puemi, come, chissacciu, pi esempiu, eccu “La triplici allianza”, unni c’è mastru Cuncettu che sbafara a caterva su politica e tattica?
Unni lu trovi ‘n cuntaturi ( e invinturi) di storie patrie?
E comu si po mmagginari …”ca lu cumannanti in capu do vascellu chianta nu corpu di cannuni a mezza carica, senza sgusciu… a mezza palla, ca, co sulu ventu fici abbulari trimmila canali…”?
Iperbole?
Ma nun sghizzamu, sulu fantasia e gnegnu a varrili.
Cappoi, pe sunetti, fusti geniu e maistru.
Certu a Roma c’era Trilussa e cumpagni, a Napuli ci n ‘erunu a cufini,
e nun mancanu certo nta l’altri cittadi, ma ccà c’era u quagghiu d’a ricotta...(’nzumma nu pocu di campanili m’u pirdunati, no?)
Ora, putacasu, mi diciti s’esisti o munnu na puisia ca ‘ncumincia accussì:
“Cummari Pudda, chi n’aviti scagghiu?”
Abbasta, va’…vaja cittadini di Sant************viditi chi vi cumminaru e scumminaru ssi vostri amministraturi -macari, chissacciu, forsi- senza valia.
Certu macari ‘n’abbasta, pi “acculturarsi” (certu, si fa pi diri) ma pi rapiri l’occhi si, picchi annunca mi veni lu magoni e a raggia m’acchiana, pi causa di qualichi ‘ngnuranti (nell’accezione del termine, s’intende), ca “illeggittimamenti!” ci resi u sfrattu nienti di menu ca a Ninu Martoglio!
Finimula ccà, pi carità di Patria.
E pi cunzolu, dopp’a puisia,
o zu’ Ninu Martogghiu,
c’addedicu na spec’i…litania.
‘Nbari Ninu
‘n vi pigghiat’i collira, ca pi mia
vu’ siti ‘n monumentu; e po’ munnu,
na cosa troppu granni è vossia.
ca nnomi e cugnomi nun ci ni sunnu
p’ abbrazzari tutt’a ssa vostra valia.
E pi finiri:
Maistru miu, sti me palori
vonu aviri u valuri di lavari
dd’uffisa
(ca ti ficiru ssi cajord’ingniurantuni);
e nu ossequio pi chiddu ca
fusti,
facisti,
scrivisti,
da parti di ‘n paisanu scribacchinu e
aedu pi casu,
o quali, parramuni chiaru:
“In remoto”,
ci facisti lizioni di
puisia vernacolare
cunzata macari cu ‘n poc’i sali
da… Picaria.
‘Nunca accussì fu e
accussì sia.
Ti vogghiu beni assai ’mbari Ninu.